13. maj 2002

FM 2002/29

Allannguutissatut siunnersuut

 

uunga

 

Atuarfik pillugu Inatsisartut peqqussutissaattut siunnersuut.

 

Pingajussaaneerlugu suliarineqarnissaanut Naalakkersuisunit saqqummiussaq.

 

 § 1 -mut

1. Immikkoortoq imatut allanngortinneqassaaq:
" § 1. Atuarfik tassaavoq kommunip atuarfiutaa, § 26, imm. 1 aamma 2 naapertorlugu, meeqqanut inuusuttunullu, atuartinneqartussaatitaasunut akeqanngitsumik ukiuni10 –ni atuartitsinissamik neqerooruteqartoq, tak. § 3."

 

§ 41 -mut

2. Immikkoortoq ima allanngortinneqassaaq:
" § 41. Kommunalbestyrelsip angajoqqaat atuartullu ilaasortaatitaat sulineranni aalajanger-simasumik akissarsiaqartissavai. Sulinermi akissarsiat annertussusaat atuarfimmi atuartut amerlassusaat, alloriarfiit amerlassusaat pissutsillu taakkununnga assingusut naapertorlugit aalajangersarneqartassapput. Atuartut akissarsiaat angajoqqaat akissarsiaasa pingajorarterutaattut angissulerneqassapput."

 

§ 43 -mut

3. Imm.1 pkt.2-tut inissinneqassaaq:
"Atuarfiup pisortaatut sulissaguni pineqartoq meeqqat atuarfianni ilinniartitsisussatut ilinniarneq imaluunniit ilinniarneq alla naalakkersuisut akuerisimasaat naammassillugu ilinniarsimasariaqarpoq."

 

§ 48 -mut

4. Imm.1 –mi allanngortinneqarput "imm. 2-3" imatut: „imm. 2-4".

5. Imm.. 2 –mi "§§ 48-51" allanngortinneqarput: "48-49".

6. Imm.2 –p kingornanut immikkoortutut nutaatut ilanngunneqarpoq imm. 3:
"Imm.3. § 14 -mi, imm. 1 aamma 2, ulloq 1. januar 2004 aallarnerfigalugu atortuulersinneqarpoq."

Tamatuma kinguneranik Imm. 3-4 allanngortinneqarput: imm. 4-5.

 

§ 49 -mut

7. Imm. 3 ima allanngortinneqarpoq:
" Inatsisartut meeqqat atuarfiat pillugu peqqussutaanni nr. 1, 6. juni 1997 –meersumi, Imm.3. § 12 –mi, imm. 1 – 3 aamma § 36 –mi, imm. 1-mi, nr. 1, ulloq 1. januar 2004 tikillugu atuutsiinnarneqarallassapput. Nalinginnaasumik immikkut atuartitsisarneq aamma allamik immikkut perorsaanikkut ikiorsiisarneq 1. januar 2004 –p tungaanut kommunit aningaasartuutigisassaraat. Annertusisamik immikkut atuartitsisarneq aamma allamik immikkut perorsaanikkut ikiorsiisarneq 1. januar 2004 –p tungaanut Namminersornerullutik Oqartussat aningaasartuutigisassaraat."

Tamatuma kinguneranik imm. 3-6 allanngortinneqarput imm. 4-7.

8. Imm. 4, imatut allanngortinneqarput: Imm. 5.
"Imm. 5. Ukioq atuarfiusoq 2003/2004 aallarnerfigalugu 7. klassimi klassiniluunniit qaffasinnerusuni atuartuusut, meeqqat atuarfiat pillugu peqqussummi, nr. 1-imi 6. juni 1997-imeersuni aalajangersakkat §§ 1-3, 5-9, 13-19, 22, 25, 28, imm.1, 32, 37 aamma 39-41 naapertorlugit, atuarnertik ingerlatissavaat. Naalakkersuisut ikaarsaariarneq pillugu malittarisassaliorsinnaapput"

 

 

Oqaaseqaatit

 

Allannguutissatut siunnersuutit maannakkut saqqummiunneqartut tunngaveqarput Inatsisartut Kultureqarnermut Ilinniartitaanermullu ataatsimiitsitaliaata peqqussutissatut siunnersuutigineqartup aappassaaneerneqarneranut tunngatillugu isumaliutissiissutaanit aamma pingajussaa-neerneqarneranut tunngatillugu isumaliutissiissutaasumut tapiliussaannik.

Tamatuma saniatigut allannguutissatut aappassaaniigassanngorlugu Naalakkersuisunit saqqummiunneqarsimasumi kukkunerit marluk paasineqarput, taamaattumillu kukkunerit taakku matumuuna naqqiiffiginiarneqarput.

Allannguutissatut siunnersuutigineqartup aappaata kingunerissavaa, 1. august 2003 aallanerfigalugu kommunit ilanngullugu pisussaaffigilissammassuk atuartut sinniisaasa akissarsiaqartinnissaat, akissarsiallu angajoqqaat sinniisaasa akissarsiaasa pingajorarterutaattut annertussusilerneqassasut. Tamanna pillugu kommunit aningaasartuuteqarnerulernerat Namminersornerullutik Oqartussaniit aaqqiivigineqassaaq kommuninut tapiissutigineqartartut qaffanneqarnerisigut Ukiumoortumik aningaasartuutaanerulerulernissaq 128.000. –nik nalilerneqarpoq. Ukioq 2003 kisiat eqqarsaatigalugu 5 / 12 -nik aningaasartuutaanerulersussaassaaq, tassami peqqussutissaq aatsaat 2003-mi augustip aallaqqaataani atuutilissammat.

Allannguutissatut siunnersuutigineqartup immikkortuisa nr. 6 aamma 7-ip malitsigissavaat, januarip aallaqqaataat 2004 tikillugu annertusisamik immikkut atuartitsisareq Namminersornerullutik Oqartussat aningaasartuutigissammassuk, tamatuma kingorna meeqqat atuarfianni atuartitsineq tamaat kommuninit aningaasartuutigisassaraat, tamatumunnga immikkut atuartitsisarneq tamarmi ilaavoq. Taamaattumik pisariaqassaaq 2004-mi januarip aallaqqaataat aallarnerfigalugu annertusisamik immikkut atuartitsisarnerup kommunininit tinguneqarnera pissutigalugu kommunit annerusumik aningaasartuuteqalernerat kommuninut tapiissutaasartut annertuserneqarnerisigut iluarsiivigineqassaa.

Allannguutaasut allat ingerlatsinikkut imaluunniit aningaasartuutitigut allatigut kinguneqartinneqassanngillat.

nr. 1 -mut

Matumani pineqarpoq siunnersuutip aappassaaniigassanngorlugu naalakkersuisunit saqqummiunneqarnerani aaqqissuisoqarfimmiit kukkussutaasimasut naqqiuteqarfigineqarneri. Siunnersuutigineqartup siullermeerlugu saqqummiunneqarnerani kukkunikkut allanneqarsimavoq "atuartitsineq," tassani eqqortumik allassimassaguni "akeqartinneqanngitsumik atuartitsineq" allassimasussaagaluartoq.

nr. 2 -mut

Matumuuna siunnersuut saqqummiunneqarpoq Inatsisartut Kultureqarnermut Ilinniartitaanermullu ataatsimiitsitaliaaniit aappassaaneerneqarnissaanut ataatsimiitsitaliap isumaliutissiissutaa tunngavigalugu.

Siunnersuutigineqartumut, atuartut sinniisaannut akissaatigititassat angajoqqaat sinniisaasa akissaataasa pingajorarterutaannik annertussiligaanissaannut tunngavilersuutitut peqqutituaavoq, angajoqqaat sinniisaasa atuarfiit siulersuisuini sulinerat tatigisaallutik toqqakkatut peqataammata, atuartulli peqataanerat atuartitaanerup ilaatut isigineqartariaqarluni aamma oqartussaaqataalluni piukkunnarsarnertut isigineqartariaqarluni. Aaammattaaq apeqqutit inunnut tun-ngasut suliarineqarnerini atuartut sinniisaat peqataasinnaatitaanngillat. Angajoqqaat sinniisaasa akissarsiaasa annertussusilerneqarnerannut tunngatillugu aallaavigineqarput Qallunaat Nunaanni inatsisit tamatumunnga naapertuuttut.

nr. 3 -mut

Allannguutissatut siunnersuutigineqartup saqqummiunneqartup matuma aallaavigai siunnersuutigineqartup pingajussaaneerneqarnissaanut tunngatillugu Inatsisartut Kultureqarnermut Ilinniartitaanermullu ataatsimiitsitaliamiit isumaliutissiissutigineqartunut tapertaliussatigut inassutigineqartut. Siunnnersuutigineqartukkut aalajangersarneqarpoq, atuarfiup pisortaata ilinniakkamigut tunuliaqutaata ilinniartitsisut tunuliaqutaat assigissagaat. Taamaalilluni matumani siunnersuummi § 30, imm. 1 –tip oqaasertalerneqarnera assigaa, tassani meeqqat atuarfianni atuartitsissagaanni ilinniarsimassutsikkut tunuliaquttat tungaasigut piginnaasassat pineqarlutik. Taamaalilluni matumani erseqqissarneqarpoq pisortaq atuartitsisinnaanermik piginnaaneqartariaqartoq.

nr. 4 -mut

Allannguutissatut siunnersuutip allannguutissaatut siunnersuutigineqatup normu 6 –ip kingunerisaanik, immikkoortoq 3 nutaaq ilanngunneqassaaq, maannamullu imm. 3-4 –simagaluit maanna imm. 4-5 –ngussapput.

nr. 5.-mut

Matumani pineqarput siunnersuutaasup aappassaaniigassanngorlugu Naalakkersuisunit saqqummiunneqarneranut atatillugu aaqqissuisoqarfimmiit kukkussutaasimasut naqqiuteqarfigineqarneri. Kukkunikkut "§§ 48 – 51" allanneqarsimapput, eqqortumik allassimassagunik "§§ 48 –49" –tut allanneqarsimassagaluarlutik.

nr. 6 -mut

Alllannguutissatut siunnersuutigineqartup kingunerisaassaatut pissusissamisoortutullu isigineqarpoq tassalu peqqussutissatut siunnersuutigineqartumi immikkut atuartitsisarneq pillugu aalajangersakkat aatsaat ukiup 2004 –p qaammataasa aallartinneranni atuutilersinneqarnissaat, taamaalilluni aaqqissuussisimaneq maannamut atuuttoq ukiumi 2003 –mi ingerlatiinnarneqassalluni aamma taamaalilluni, immikkut atuartitsisarneq pillugu allannguutissat ukioq 2003 –mut tunngatillugu tapiissutissat isumaqatigiissutiginiarneqarnerannut sunniuteqaqqunagit. Tamatuma pisariaqartippaa, Naalakkersuisut KANUKOKA’ llu atuutilersitsinissaq sioqqullugu immikkut atuartitsisarneq pillugu oqartussaaffiit agguataarneqarnerisa allannguuteqartinnissaannut tunngatillugu immikkut atuartitsinerup akisussaaffiginera kommuninit tiguneqarpat aningaasaqarnikkut atugassaritaasut 2004 –mut tapiissutissat isumaqatigiinniutigineqarnerannut atatillugu isumaqatigiissutaasimanissaat. Isumaqatigiinniarnermi aallavigineqassapput atuartut maannakkut immikkut annertusisamik atuartinneqarnissaminnik pisariaqartitsisut amerlassusaat. Taamaattumik isumaqatigiissutaasup aallaavigissavaa kommunikkaartumik immikkut annertusisamik atuartitsinermi atuartut amerlassusaat tassanilu siunertaassaaq kommunit akornanni imatut isumaqatigiittoqassasoq aningaasartuutit atuartoq malinnaaffigissagaat ukiup atuarfiusup ingrlanerani atuartoq kommunimiit kommunimut nuuppat.

Allannguutissatut siunnersuutigineqartoq allannguutissatut siunnersuutigineqartumut nummer 7 –mut ataqatigiissinneqassaaq, taassumalu kingunerissavaa, immikkut atuartitsisarneq pillugu malittarisassat maannamut atuuttut ulloq 2004-mi januarip aallaaqqaataat killigalugu attatiinnarneqarnissaat.

nr. 7 -mut

Allannguutissatut siunnersuutigineqartup nr. 6.-ip kingunerisaanik allannguutissatut siiunnersuut saqqummiunneqarpoq. Taamaattumik nr. 6 –mut oqaaseqaatigineqartut matumuuna innersuussutigineqassapput.

nr. 8 -mut

Allannguutissatut siunnersuutigineqartoq naapertorlugu, siunnersuutaasimasut nr.6 -ip aamma 7 -ip kingunerisaannik immikkut atuartitsinermut tunngatillugu ikaarsaariarnermi aalajangersakkat ersarissarneqarnissaat pisariaqalersippaat, tassani peqqussut atuuttoq naapertorlugu aalajangersakkani malittarisassat atuuttut sorliit malillugit atuartunut atuarnerminnik naammassinnittunut maannakkutuut atuutsinneqaannassanersut pineqarlutik.

Matumuuna aalajangersakkat atuartitsinermut namminernut iluarsartuutaasut atuutsiinnarneqartussat kisimik ersarissaaviginiarneqarput, inatisilli allat atuarfiup aqunneqarneranut, ilinniartitsisunut, naammagittaalliuuteqartarnernut, aningaasaliisarnernut il.il., meeqqat atuarfianni atuartunut tamanut assigiimmik atuutsinneqassapput. Peqqussutissatut siunnersuutigineqartumi aalajangersakkat arlalissuit maannamut peqqusummi atuuttumeersuupput, taamaattumillu allannguuteqartinneqaratik. Matumani ilaatigut makku pineqarput, atuartunut angerlasimaffiit, atuartunut inissiat atuarfiillu najugaqarfiusut pillugit aalajangersakkat (§ 10), atuartitsinermi atortussat pillugit (§ 20), atuarfinni atuakkanik atorniartarfiit pillugu (§ 21) aamma angajoqqaat akisussaanerat pillugu aalajangersakkat (§ 29).